سنة مرت من العمر بحلوها ومرها بس هادي السنة مو زي كل سنة أغلب السنين بتعدي بسرعة بلمح البصر بس هادي السنة كانت ليا مو سنة كانت عمر كامل أحداث متراكمة ورى بعض مشاكل لا تنتهي ورى بعضها ضغط عصبي ونفسي أكتر مما أحتمل على قد ما تعبت على قد ما أتعلمت أشياء ممكن لو قعدت عمر كامل ما كنت راح أتعلمها
أول شي وأهم شي أتعلمته هوا قاعدة “نفسي نفسي” قاعدة قديمة ومعروفة عند الكل لاكن الكل يحتقرها ويبعد عنها وحتى إلي ما شي بيها برضه يتبرأ منها وما يعترف بيها المشكلة إنه كل إلي يشوه هادي القاعدة وينسبها للأنانية وإنها ضد الإيثار راح يجي اليوم إلي كلنا راح نطبقها وهوا يوم القيامة يا سبحان الله يعني أجلس طول عمري أتعب وأعمل عكس هادي القاعدة وأئثر غيري عشان في الأخير أطبقها طيب ما أطبقها من البداية وأريح نفسي صدقوني عم “إيثار” أنتحر من زمان يعني مات وشبع موت ولو فكرت في يوم إنك تإثر أحد على نفسك فأفتكر إني قلتلك إنه أنتحر وإنه إلي قاعد يوسولك بالإيثار هوا الشيطان عشان يجي في الأخير يدندن على راسك ويخليك تندم ويكرهك حياتك واليوم إلي فضلت أحد على نفسك ومو بعيد الإنسان إلي فضلته على نفسك المرة الجاية ما ارح يعملك حساب وراح يمشي على قاعدة “نفسي نفسي”.
الشي التاني قاعدة ” صاحبي وأخويا وحبيبي وعشرة مدري كم مليون سنة وخازن أسراري ومالي غنى عنو” برضو أقلك القاعدة هادي كانت أيام زمان الأيام دي لا في صاحبي ولا أخويا ولا حبيبي ولا عشرة عمر ولا أمين سري ولا الأفلام الأسود والأبيض هادي دحين في إنك تعتبر الكل زملاء لك وأسرارك خليها ليك والعشرة بلها وأشرب مويتها قديمة ما عادت تنفع وحط في بالك إنه إلي فاكره صاحبك في يوم وليلة ممكن يقلب عليك وأسرارك راح يزلك بيها ويستخدمها ضدك أخرج وأنبسط وعيش حياتك بس لا تسلم رقبتك لأحد لا لصاحب ولا غيره ولا يحزنون لأن الأصحاب خلصوا المصنع وقف والبضاعة خلصت في السوق الموجود دحين كلوا صيني مغشوش تبع عيش حياتك والمصلحة فوق كل شي في مصلحة أخويا وصاحبي ونور عيني خلصت المصلحة ما عاد تلزمني في حاجة وكل مين في طريق.
الشي التالت قاعدة “وعد الحر دين عليه” طيب نتكلم بصراحة ومين اليوم بيسدد الدين إلي عليه ولا أحد أو قليل يا عيني وهما دول إلي بياكلوا على روسهم أعتقد فاهمني يعني من الآخر أنسى كلمة وعد لأنه هادي الكلمة أتلغت من القاموس الحالي صارت كلمة غريبة مش مفهومة من ألفاظ الجاهلية يعني إلي يبغالها متخصص في اللغة العربية عشان يفهمنا هيا الكل بيوعد بس فين إلي بيوفوا يتعدوا ع الاصابع وفي الأخير يكتشفوا إنه أنضحك عليهم وطارت الطيور بأرزاقها وهوا إلي واقف يتفرج من دحين لو عندك أي شي واعد بيه ألحق نفسك وأنقضه وعيش حياتك بلا وعد بلا كدب لا هم زايد.
الشي الرابع قاعدة ” الصراحة وأنا صريح وإلي في قلبي على لساني وبلا بلا بلا ” قبل ما تتكلم حاب أقلك إني قبل كم يوم وصلني خبر إنه ستنا الصراحة ماتت وأندفنت وشبعت موت وصليت عليها صلاة الغائب طبعاً إلي دفنها أتكتم على الخبر وما حب ينشره لمصلحة عليا علشان في كم مليون شخص مؤمنين بيها ومؤمنين إنها خالدة وعاشوا عمرهم كلوا في الصراحة خسروا ناس وجرحوا ناس كتير وضروا نفسهم كتير وفقدوا أشياء كتير بسبب صراحتهم ولو عرفوا الخبر أكيد راح ينهاروا وأتخبى الموضوع وفضلوا هدولا يعلموا إلي بعدهم ودواليك بدون ما يوصلهم خبر إنها أتوفت وإنه أتولد في العالم شي جديد إسمه الخبث أو اللف والدوران أو الفراخة أو المداراة أو اللعب بالبيضة والحجر وغيره من الأسماء إلي كلها تدل على شي واحد هوا إلي ما شي اليومين دي تكون صريح وواضح تخسر كل حاجة حتى نفسك تلف وتدور وتلعب ع الحبلين ووجه هنا ووجه هناك تمشي مية المية والكل يضربلك سلام و تكسب كل حاجة وما تخسر ولا حاجة وطبعاً الخبث أو اللف والدوارن و نفسي نفسي أصدقاء من زمان وكل واحد فيهم يخدم التاني وييسرله.
وآخر شي أحب أقوله لا تأمن لأحد أبداً حتى نفسك وخلي عندك ذرة شك مهما كانت الأمور واضحة ولو حسيت بشي مريب ولو بسيط على طول أنسحب طبق هادي الكم قاعدة وصدقني راح تعيش حياة هنيئة مليئة بالإنجاز والسعادة والنجاح وراح تكسب كل شي وما راح تخسر ولا شي
————————————————————————————————————
عارفين فين المشكلة
المشكلة إنه كل الكلام هذا إلي فوق ما راح أقدر أسويه لأني أتعودت على عكسوا رغم إني تعبت كتييييييييير بسبب الصراحة وبسبب الأصحاب وبسبب الوعود وبسبب تفضيل غيري عليا يعني قدام طريقين
طريق راح أرتاح فيه نوعاً ما وراح أكسب أشياء كتير بس ضميري راح يأنبني
وطريق راح أتعب وأعصابي راح تتلف فيه بس ضميري يكون مرتاح
الصراحة ما أتمنى أسوي كل هادي النصايح رغم إنها هادي إلي ما شية اليومين دي لأنه الكل صار يتبعها عشان كدة أقول إنه مالكم غير الكلام إلي فوق ولا إنتوا إش رأيكم؟؟؟
