كل عام وإنتم بخير

أنقطعت فترة طويلة عن التدوين وعن المدونة لسببين السبب الأول دخول موسم الحج وإنشغالي في العمل الموسمي والسبب التاني إنه بعد ما خلص العمل وبدأت الدراسة بدأت الإختبارات أول يوم في الدراسة كان الأحد أول محاضرة سيرة نبوية كان عندي إختبار وأنا ما أدري (طبعاً الدفرة الزايدة تسوي أكتر من دة ^-^ ) المهم  و أدخل القاعة ألاقي الطلاب مشغولين في الكتب والأوراق وأنا أكلم نفسي أقول إش الجد والإجتهاد إلي نازل على الجامعة هذا من أول يوم مراجعة وتحضير المهم وشوية يدخل الدكتور ويبدأ يقسمنا عشان الإختبار طبعاً أنا علامات إستفهام وتعجب فوق  راسي المهم وبين إني أختبر أو أكلم الدكتور عشان أختبر مع مجموعة تانية سبقني واحد قاله أنا ما أدري عن الإختبار وبدي أختبر مع مجموعة تانية قلوا يا تختبر يا تطلع برة وما في إختبار بس عاد أنا قلت أختبر أحسن وأختبر والحمد لله عدت على خير كانت الأسئلة سهلة مو صعبة كلها صح وخطأ المهم وبعد أسبوع إختبار تاني كيمياء برضه عدى على خير (الشي إلي أنا مستغرب منه إنه في بعض الناس ما يجيهم نفس يتضاربوا ولا يحرقولي في أعصابي إلا أيام الإختبارت من سنة لين دحين نفس الموال ) المهم وخلصت إختبار رسم هندسي يوم الثلاثاء ولسة عندي مجموعة إختبارات الأيام الجاية بس يعني سهالة إن شاء الله مو ديكا الصعوبة (أنا عارف إني طولتها وهي قصيرة)

المهم حاب أقلكم كل عام وإنتم بخير لعيد الأضحى (بدري من عمركم ^-^ ) وللسنة الجديدة

المشكلة في عيد الأضحى إننا في مكة ما نعرفه ما نعرف إلا عيد الفطر لأنه عيد الأضحى كل أهل مكة يكونوا شغالين في خدمة ضيوف الرحمن أو جالسين في بيوتهم عشان الزحمة فمافي عيد رغم إنه في محاولات في الإحتفال بالعيد من خلال الرسائل بس أنا أشوف إنه كل المحاولات باءت بالفشل لأنه ممكن تجيك رسائل تعييد يوم عشرة بس تلاقي نفسك منتا فاضي تحك راسك عشان ترد على الرسائل أو علة الإتصالات أو عشان تدق تعيد.

في بالي أفكار كتير ومواضيع كتير وإن شاء الله الأيام الجاية راح أنزل مواضيع وأنهي فترة الركود الحالية  في المدونة.

مشكورين لمتابعتي وآسف ع الإطالة